केलेल्या कामाचे बिलं मंजुर करण्यासाठी ठेकेदाराकडे दिड लाख रुपयांची लाचेची मागणी करुन त्यापैकी ३० हजाराची लाच स्विकारणार्या सिडकोतील कार्यकारी अभियंता कल्याण पाटील याला ठाणे लाच लुचपत प्रतिबंधक विभागाच्या पथकाने रंगेहाथ अटक केली. विशेष म्हणजे कल्याण पाटील याने पुर्वीची ३ बिलं मंजुर करण्यासाठी १ लाख २० हजार रुपये स्विकारले होते.
या प्रकरणातील विपीन पाटील हा ठेकेदार खारघर येथील कोपरी गावात राहण्यास असून, त्याने कळंबोळी ब्रिज, खांदा कॉलनी व खारघर रेल्वे स्टेशनची कामे पुर्ण केली होती. या तीन बिलाचे ७ लाख ५६ हजार रुपयांचे बिल मंजुर करण्यासाठी कार्यकारी अभियंता कल्याण पाटील याने २ लाख रुपये लाचेची मागणी केली होती. त्यानंतर पाटील यांनी दिड लाख रुपयांची मागणी केली होती.
त्यावेळी ठेकेदार विपीन पाटील याने कल्याण पाटील यांना १ लाख २० हजार रुपये दिल्यानंतर त्याचे बिल मंजुर केले होते. त्यानंतर ठेकेदार विपीन पाटील याने कळंबोली ब्रिज व खारघर रेल्वे स्टेशन येथील ब्रिजची कामे पुर्ण करुन बिल सादर केले होते.
यावेळी देखील कल्याण पाटील यांनी मागील तीन बिलाचे बाकी राहिलेले ३० हजार रुपये व चालु नवीन तीन बलांचे दिड लाख रुपये दिल्यानंतरच त्याच्या बिलावर सही करणार असल्याचे सांगितले होते. त्यामुळे ठेकेदार विपीन पाटील याने ठाणे लाच लुचपत प्रतिबंधक विभागाकडे लेखी तक्रार दिली होती.
त्यानंतर कल्याण पाटील यांनी मागील बिलातील राहिलेली ३० हजाराची रक्कम घेऊन सीबीडीतील एमजीएम हॉस्पीटल जवळ बोलावले होते. त्यामुळे ठाणे लाच लुचपत प्रतिबंधक विभागाने याठिकाणी सापळा लावला होता. यावेळी त्याठिकाणी आपल्या चार चाकी कारमधुन आलेल्या कल्याण पाटील यांनी ठेकेदार विपीन पाटील याच्याकडून ३० हजारांची रोख रक्कम स्विकारल्यानंतर लाच लुचपत प्रतिबंधक विभागाने त्याला रंगेहात पकडले. त्यानंतर कल्याण पाटील याच्या विरोधात सी.बी.डी पोलीस ठाण्यात गुन्हा दाखल करुन त्याला अटक करण्यात आली.
Post a Comment