अनुराधा पौडवाल यांच्यातर्फे शाळेला आर्थिक मदत

म्हसळा । वार्ताहर 

 न्यू इंग्लिश स्कूल नेवरूळ विद्यालयाला जित्मल चांदमल दमानी ट्रस्टच्या माध्यामातून ५० हजार रुपयांचे आर्थिक सहाय्य देण्यात आले . पद्मश्री अनुराधा पौडवाल यांच्या हस्ते हा धनादेश स्कूल कमिटीला देण्यात आला . कृष्णाजी महाडिक यांच्या प्रयत्नातून मिळविलेल्या या मदतीचा स्वीकार करण्यात आला . प्रसंगी रायगड जिल्हा परिषदेचे कृषी सभापती बबन मनवे , महेश घोले , अक्षय महागावकर , संजय लटके , सल्लागार समिती अध्यक्ष रवींद्र लाड , ग्रामस्थ मंडळ अध्यक्ष राजेंद्र लटके , पोलीस पाटील निलेश लटके , सुनील दिवेकर , तुषार रिकामे , पांडुरंग खेडेकर आदी मान्यवर उपस्थित होते . निसर्ग चक्रीवादळाने रायगड जिल्ह्याला झोडपले . विशेषतः श्रीवर्धन , म्हसळा भागात त्याचा जोर जास्त असल्याने गावेच्या गावे उद्ध्वस्त करुन सोडली . अनेक घरं , सार्वजनिक सुविधा वादळात कोलमडल्या , त्याचबरोबर शाळासुद्धा भुईसपाट झाल्या . त्यामुळे गावकऱ्यांपुढे मुलांच्या पुढील शिक्षणाची आणि शाळा पुन्हा नव्याने उभी करण्याच्या समस्या होत्या . ही समस्या समाजसेवक कृष्णाजी महाडिक यांच्या प्रयत्नातून जित्मल चांदमल दमानी ट्रस्ट , यांच्या विद्यमाने शाळेस ५०,००० रु.चा आर्थिक मदत जाहीर करुन त्वरित धनादेशाही देण्यात आला . त्याचप्रमाणे पद्मश्री गायिका अनुराधा पौडवाल यांनीही ग्रामीण भागातील मुलांच्या संगणकीय विकासासाठी , शहरी मुलांप्रमाणे गोरगरिबांच्या शेतकऱ्यांच्या मुलांनाही शिक्षण मिळावे यासाठी शाळेला संगणक किंवा इतर शालेय साहित्यासाठी मदत देण्याचे तसेच आणि गोरगरिबांच्या मुलांच्या शिक्षणाची सोय करण्यासाठी आवश्यक मदत करण्याचे आश्वासन या कार्यक्रमाप्रसंगी दिले.