श्रीवर्धन : अंधारातून प्रकाशाकडे ; महावितरणच्या विज योध्यांचे काम युद्धपातळीवर

श्रीवर्धन (संतोष सापते )

०३ जून च्या चक्रीवादळाने श्रीवर्धनचा चेहरामोहरा बदलून गेला आहे .निसर्ग संपत्तीचे अतोनात नुकसान झाले आहे त्या सोबत माणसांचे दैनंदिन जीवन सुरळीत चालण्यासाठी आवश्यक असलेल्या अनेक सेवा व  सुविधा खंडित झाल्या आहेत .संपुर्ण श्रीवर्धनमधील विद्युत पुरवठा गेल्या ०३ जून पासून खंडित आहे .त्याचा परिणाम लोकांच्या दैनंदिन जीवनावर झाला आहे . मात्र काल चा श्रीवर्धनमधील विद्युत महावितरणचे सबस्टेशन पुर्ववत झाल्याचे वृत्त समजले आहे .त्या कारणे श्रीवर्धनमधील अंधाराचे साम्राज्य लवकरच नाहीसे होऊन शहराची प्रकाशाच्या दृष्टीने वाटचाल होत आहे .श्रीवर्धन तालुक्यात लहान मोठी जवळपास ७८  गावे आहेत .व श्रीवर्धन ची आजमितीची लोकसंख्या ८२  हजारच्या  जवळपास आहे .निसर्ग सौंदर्य ही श्रीवर्धन ची खरी ओळख होती मात्र चक्रीवादळाने हजारो वृक्ष व  लता नष्ट केल्या आहेत .तालुक्यातील सर्व गावांचे  वादळात प्रचंड नुकसान झाले आहे .महावितरण चे विद्युत पुरवठा करणाऱ्या अनेक  पोलची दुरवस्था झाली आहे .विद्युत वाहक तारा तुटल्या आहेत .पथदिवे फुटले आहेत .अनेक घरातील जोडणी वाऱ्या मुळे तुटली आहे . श्रीवर्धन च्या भौगोलिक परिस्थिती मुळे कामात असंख्य अडचणी येत होत्या  मात्र कर्मचाऱ्यांनी जिद्दीने काम केले आहे  तसेच चक्रीवादळाने महावितरणाचे करोडो रुपयांचे नुकसान झाल्याचे महेंद्र वाघपैंजन यांनी सांगितले आहे . आजमितीस जिल्हा बाहेरील अनेक  ठेकेदार श्रीवर्धन मध्ये आले आहेत .विद्युत पुरवठा सुरळीत करण्यासाठी महावितरणचे कर्मचारी भरपावसात काम करताना दिसत आहेत .युध्द पातळीवर होणाऱ्या कामाला मुळे सर्वसामान्य माणसाला विद्युत पुरवठा लवकर सुरू होण्याची आस लागली आहे .कारण ०३ तारखे पासून विद्युत पुरवठा खंडित झाल्याने सर्वसामान्य व्यक्तींचा जीव कासावीस झाला आहे .ऐन पावसाळ्याचे दिवस असल्याने वातावरणात प्रचंड उष्मा निर्माण झाली आहे .श्रीवर्धन ला वीज पुरवठा करणारी मुख्य विद्युत वाहिनी पाबरा येथून येते .स्थानिक महावितरणचे कर्मचारी व वाशी ,पालघर, ठाणे आणि मालेगाव येथून आलेल्या कर्मचाऱ्यांना प्रयत्नांची पराकाष्ठा करून विद्युत पुरवठा सुरळीत करण्यासाठी जोरदार प्रयत्न केले आहेत .श्रीवर्धन बागमांडला फिडर ,श्रीवर्धन शहर फिडर ,जांभूळ फिडर व श्रीवर्धन बोर्ली फिडर या सर्व ठिकाणी कर्मचारी कार्यरत आहेत .श्रीवर्धन शहराच्या विविध ठिकाणचा विद्युत पुरवठा सुरळीत करण्यासाठी कर्मचाऱ्यांच्या विविध  टीम कार्यरत असल्याचे दिसून येत आहे .

श्रीवर्धन शहराचा विद्युत पुरवठा लवकरच सुरू करण्यासाठी आम्ही प्रयत्नशील आहोत .सर्व कर्मचारी अतिशय शिस्तबद्ध पद्धतीने काम करत आहेत .जनतेने सहकार्य केले त्या  बद्दल मी जनतेचा ऋणी आहे ......महेंद्र वाघपैंजन (उपकार्यकरी अभियंता श्रीवर्धन )

निसर्ग चक्रीवादळाने सर्वांचे अतोनात नुकसान झाले आहे .महावितरणच्या सर्व कर्मचाऱ्यांनी दिवस रात्र मेहनत घेतली आहे .लवकर श्रीवर्धन चा विद्युत पुरवठा पुरवत होईल .....रितेश मुरकर (वर्कर फेडरेशन गोरेगाव विभाग )