दांडगुरी : वार्ताहर
राज्यातील लाखो शिवभक्तांचे श्रद्धास्थान असलेल्या दक्षिण काशी श्री क्षेत्र हरिहरेश्वरला श्रावण महिन्यातील पहिल्याच सोमवारी भाविकांची मांदियाळी पाहायला मिळाली . पावसातही दिवसभरात शेकडो भाविक दर्शनासाठी उपस्थित होते . श्रावण महिन्यात ही संख्या वाढत जाते . काल श्रावण महिन्यातील पहिला सोमवार असल्याने पहाटे ४ वाजल्यापासून या ठिकाणी भाविकांची मोठी गर्दी सुरु झाली . दिवसभर मध्ये मध्ये पावसाच्या सरी सुरु असूनही भाविकांची रिघ वाढतच होती . आजच्या पवित्र दिवशी देवावर अभिषेक करण्यासाठी मोठी रांग पहायला मिळाली . भाविकांची कोणत्याही प्रकारे गैरसोय होवू नये यासाठी देवस्थान कमिटीचे अध्यक्ष वामन बोडस , सचिव सिद्धेश पोवार पदाधिकारी व पोलीस पाटील विनोद भोसले जातीने लक्ष ठेवून होते संध्याकाळी उशीरापर्यंत येथे गर्दा पाहायला मिळाली. रायगड जिल्ह्यातील हरिहरेश्वर हे ठिकाण दक्षिण काशी म्हणून ओळखले जाते . एका बाजूला हरिहरेश्वराचा डोंगर तर दुसया बाजूला निळाशार समुद्र यामुळे तीर्थास्थान आणि पर्यटन असे दोन्हीही होतात . हरिहरेश्वर , कालभैरव योगेश्वरी , सिद्धिविनायक व हनुमान अशी चार मंदिरे तसेच समुद्रकिनारी असणारे विष्णुपद , गायत्रीतीर्थ , वक्रतीर्थ , सूर्यतीर्थ , यज्ञकुंड विष्णुतीर्थ अशी अनेक ठिकाणे आहेत . कर्नाटकातील गोकर्ण ते ठाणे जिल्ह्यातील निर्मळ हे ५०० मैलांचे दक्षिणोत्तर अंतर व ४८ मैल सुंद एवढा प्रचंड परिसर हा श्री क्षेत्र हरिहरेश्वराचा परिसर मानण्यात येतो . सावित्रीला दिलेल्या वराप्रमाणे ब्रह्मदेवाने सावित्रीसह यज्ञ केला . या हरिहरेश्वर क्षेत्राच्या दक्षिण दिशेला व उत्तर दिशेला १२ ज्योतिर्लिंग स्थाने आहेत . देशात एकूण १०८ तीर्थस्थाने असली तरी प्रमुख तीर्थ हरिहरेश्वरमध्ये आहे असे मानले जाते . हरिहरेश्वरचा महापवित्र क्षेत्र असा उल्लेख श्री हरीहरेश्वर माहात्म्य पोथीमध्ये आहे . हरिहर नावाच्या पश्चिमाभिमुख असलेल्या या देवात हरिस्वरूप व हरस्वरुप या दोन्हींचा संगम झाला आहे सर्वसाधारणपणे प्रथम काळभैरवाचे दर्शन , नंतर हरिहरेश्वराचे दर्शन करून परत काळभैरवाचे दर्शन घ्यावे अशी प्रथा येथे आहे . शंकर व पार्वती यांचे एकत्रित दर्शन घेण्यासाठी उभयतांची देखील मोठ्या प्रमाणावर गर्दा होत असल्याची माहिती सचिव सिद्धेश पोवार यांनी दिली . या क्षेत्रात ज्या चार टेकड्या आहेत , त्यांच्यासारखी रचना हरिहरेश्वराच्या लिंगावर दिसून येते . या दोन्ही देवळात दर्शन घेतल्यावर कराव्या लागणाया प्रदक्षिणेचा मार्ग डोंगर आणि समुद्राजवळच्या खडकांवरून जातो . या मार्गावरील शे - दीडशे पायऱ्या खाली उतरून त्या डोंगराची प्रदक्षिणा केली जाते . या संपूर्ण प्रदक्षिणेचे अंतर एक कोस असल्याने तिला कोसाची प्रदक्षिणा असे म्हणतात . मंदिर जरी समुद्र किनार्यावर असले तरी प्रदक्षिणा मार्ग डोंगरावरुन व समुद्रामधून आहे . कोकणपट्टीतील एक निसर्गरम्य असे पवित्र तीर्थस्थान आहे या मार्गातून दिसणारा समुद्र आणि तिथले सृष्टीसौंदर्य डोळ्यांचे पारणे फेडणारे आहे . या क्षेत्राला नयनरम्य समुद्रकिनारा लाभला आहे त्यामुळे येथे भाविक पर्यटकांची गर्दी मोठ्या प्रमाणावर पाहायला मिळते .
Post a Comment