रायगड जिल्ह्यात मान्सूनपूर्व पावसाची दमदार एंट्री किनारपट्टीसह घाटमाथ्यालाही झोडपलं
रायगड | २६ मे २०२५ : सकाळी ८ वाजेपर्यंतचा पर्जन्यमान अहवाल
रायगड जिल्ह्यात कालपासून पडणाऱ्या मुसळधार पावसाने संपूर्ण जिल्ह्याला झोडपून काढले असून काही भागांत मान्सूनपूर्व पावसाचा जबरदस्त तडाखा बसल्याचे चित्र आहे. किनारपट्टीसह मध्य व घाटमाथ्याच्या भागांत पावसाने दमदार हजेरी लावली आहे. विशेषतः मुरुड (३७१ मिमी), श्रीवर्धन (३०७ मिमी) आणि म्हसळा (३०० मिमी) या तालुक्यांनी ३०० मिमीच्या वर पर्जन्यमान नोंदवत ‘अलर्ट झोन’मध्ये स्थान पटकावले आहे.
तालुकानिहाय पर्जन्यमान (मिमीमध्ये) – २६ मे २०२५, सकाळी ८ पर्यंत
मुरुड – ३७१
श्रीवर्धन – ३०७
म्हसळा – ३००
तळा – १८२
रोहा – १६६
सुधागड – १०४
महाड – ९९
पोळादपूर – ९४
पनवेल – ८२.४
अलिबाग – ७८
माणगाव – ६३
खालापूर – ६२
उरण – ५५
करजत – ५४.६
पेण – ५०
माथेरान – आकडेवारी उपलब्ध नाही
किनारपट्टीचे चित्र गंभीर
मुरुड, श्रीवर्धन आणि म्हसळा या किनारपट्टीच्या तालुक्यांमध्ये प्रचंड पावसामुळे काही सखल भागांत पाणी साचल्याचे चित्र आहे. अनेक गावांतील रस्ते जलमय झाले असून, मच्छीमारवाड्यांमध्ये घरांमध्ये पाणी घुसल्याचेही वृत्त आहे. म्हसळा तालुक्यातील खरसई, बनोटी, आंबेत परिसरात जोरदार सरी कोसळल्या.
घाटमाथ्यावरही पावसाचा जोर
महाड, पोलादपूर, सुधागड आणि तळा तालुक्यांतही मोठ्या प्रमाणात पावसाची नोंद झाली आहे. जंगल भागांमध्ये मातीचे रस्ते खराब झाल्याने काही दुर्गम गावांशी संपर्क तुटल्याचे कळते. नद्यांमधील पाण्याची पातळी वाढत असून प्रशासनाने सतर्क राहण्याचे आवाहन केले आहे.
हवामान खात्याचा इशारा
हवामान विभागाच्या माहितीनुसार, पुढील २४ ते ४८ तासांत कोकणात मुसळधार ते अतीमुसळधार पावसाची शक्यता असून मच्छीमारांनी समुद्रात न जाण्याचा सल्ला देण्यात आला आहे. जिल्हा प्रशासनाने आपत्कालीन यंत्रणा सज्ज ठेवल्या आहेत.
भविष्यातील तयारीसाठी नागरिकांनी सतर्क राहावे, घराबाहेर न पडता सुरक्षित स्थळी थांबावे, अशी विनंती स्थानिक प्रशासनाकडून करण्यात येत आहे.
Post a Comment