लोकसभेतील उप- गट नेतेपदी खासदार तटकरे यांची निवड

खासदार सुप्रिया सुळे यांची राष्ट्रवादी काँग्रेसच्या लोकसभेतील गटनेतेपदी निवड उप- गट नेतेपदी खासदार तटकरे यांची निवड

संजय खांबेटे : म्हसळ प्रतिनिधी 

खासदार सुप्रिया सुळे यांची राष्ट्रवादी काँग्रेसच्या लोकसभेतील गटनेतेपदी निवड करण्यात आली आहे. यापुर्वी हे पद पक्षातून बाहेर पडलेले तारीक अन्वर यांच्याकडे होते. त्यांच्या राजीनाम्यानंतर सुप्रिया सुळे यांच्याकडे पक्षाची बाजू लोकसभेत मांडण्याची जबाबदारी आली आहे.  त्याच सोबत उप- गट नेतेपदी पक्षाचे सरचिटणीस व रायगडचे खासदार सुनिल तटकरे यांची . निवड करण्यात आली .खासदार तटकरे हे संसदेत पहील्या दिवसापासून रायगडसह महाराष्ट्राचे अत्यंत अभ्यासू पणे विविध विषय मांडींत आहेत.

खासदार सुनील तटकरे यांनी ट्विटकरून निवडीबद्दल राष्ट्रवादी काँग्रेसचे अध्यक्ष शरद पवार यांचे आभार मानले आहे. “राष्ट्रवादी काँग्रेस पक्षातर्फे माझी लोकसभेत उपगटनेता पदी नियुक्ती करण्यात आली आहे, याबद्दल राष्ट्रवादी काँग्रेस पक्षाचे आणि आदरणीय खा. शरद पवार साहेबांचे मनःपूर्वक आभार! या संधीचा मी आपण माझ्यावर दाखवलेला विश्वास सार्थ ठरवण्यासाठी व लोकांच्या हितासाठी पूर्ण उपयोग करेन.”, असेही तटकरे यांनी म्हटले आहे.

सुप्रिया सुळे या बारामती लोकसभा मतदारसंघातून दुसऱ्यांदा लोकसभेवर निवडून गेल्या आहे. तत्पुर्वी त्या राज्यसभेवर बिनविरोध निवडून गेल्या होत्या. आपल्या आतापर्यंतच्या संसदीय कारकीर्दीत सुप्रिया सुळे यांनी अभ्यासू खासदार अशी प्रतिमा निर्माण करण्यात यश मिळविले आहे. याशिवाय संसदेतील उत्तम कामगिरीच्या जोरावर संसदरत्नसह विविध पुरस्कारही त्यांना मिळाले आहेत. लोकसभेत सर्वाधिक उपस्थिती, सर्वाधिक प्रश्न विचारणे, आपल्या मतदार संघातील प्रश्न मांडून त्यांवही तड लागेपर्यंत पाठपुरावा करणे या त्यांच्या कामगिरीसाठी आजवर त्यांना अनेक पुरस्कार प्राप्त झाले असून अगदी अलीकडेच युनिसेफ या जागतिक संघटनेचाही पुरस्कार त्यांना मिळाला आहे.